Outes dinamiza o uso do galego a través do comercio local

O SNL puxo en marcha unha iniciativa que distribuirá de xeito gratuíto bolsas de tea, dípticos informativos e propostas para fomentar o uso da lingua galega

Outes, setembro de 2021. Baixo o título en Outes, en galego! o Servizo de Normalización Lingüística (SNL) do Concello de Outes planificou unha campaña de dinamización lingüística no ámbito comercial coa que se pretende promover o emprego do galego como lingua habitual na realización do traballo dos negocios. O técnico de normalización lingüística, Luís Pérez Barral, sinalou que a campaña promoverá o uso do galego tanto entre comerciantes como entre clientes e achegará razóns da importancia de usar o galego no ámbito económico. Pérez Barral explicou que a lingua galega achega valores positivos que debemos resaltar como son a proximidade, a calidade, a autenticidade e mesmo permite xerar postos de traballo no país. Desde o SNL valórase positivamente que moitos comercios xa traballen en galego de maneira habitual polo que seguirán traballando para facilitar que isto siga sendo así.

En declaracións da tenente de alcalde, Alba Quintela Vilariño, “despois da boa acollida que tivo a iniciativa de promoción e galeguización do comercio outense posta en marcha o ano pasado, o decidimos retomar a iniciativa co fin de chegar a máis veciños e veciñas”. Quintela Vilariño destacou que o Concello de Outes ten compromiso co uso e dinamización da lingua galega en todos os ámbitos e “con esta campaña fixamos un dobre obxectivo; potenciar o uso da lingua galega como distintivo de prestixio do comercio local, dámoslle máis visibilidade e colaboramos co tecido comercial e hostaleiro” aclarou.

Outro dos obxectivos desta campaña, segundo Quintela, é colaborar activamente co comercio e hostalaría, para fomentar o consumo que se fai nos negocios a localidade. Con este propósito distribuiranse gratuitamente materiais útiles e atractivos para os comerciantes e para a clientela  tales como adhesivos, folletos explicativos sobre a importancia de usar o galego no ámbito económico, bolsas de tea, etc. “Esta acción permite establecer sinerxías e unificar esforzos na mellora da imaxe e da marca do tecido empresarial outense” declarou. Por último, desde o Concello informan que o SNL tamén prestará asesoramento lingüístico de maneira gratuíta a todos os negocios que desexen aumentar a presenza do galego no comercio e facilitaranse estratexias e recomendacións de comunicación e de atención ao público.

Sorteo A Feiriña

O Concello de Outes, co obxectivo de incentivar o consumo nos establecementos comerciais e hostaleiros da localidade, sortea un xantar ou cea para dúas persoas valorada en 80 euros. Poden participar no sorteo todas aquelas persoas, maiores de 18 anos, que consuman e merquen nos negocios que participan na segunda edición da Feiriña organizada polo Concello de Outes.

A Serra de Outes acollerá a segunda edición da Feiriña

O evento quere ser un escaparate para o comercio local e contará con actuacións de música e teatro

A rúa da Capela, na Serra de Outes, acollerá o vindeiro sábado 21 de Agosto a segunda edición de “A Feiriña”, un evento organizado polo Concello de Outes en colaboración co comercio local. A rúa da Capela encherase de postos ao aire libre nos que que os comercios do concello que o desexen poderán expor e vender os seus produtos. Nesta edición participarán establecementos diversos que ofertan dende roupa e confección, regalos, artesanía a produtos do agro e gastronómicos produtores e negocios locais.

Ao igual que na primeira edición, A Feiriña contará con actuacións diversas para facer máis atractivo e agradable a xornada do sábado. Así, ás 12.30 h terá lugar unha actuación dirixida ao público infantil por parte da compañía “Teatro Calavera”. Ás 14 horas, para amenizar a sesión vermú, actuará o grupo de música indie “Momboi” e ás 21 horas actuará o grupo “Malo Será”, quen traerá ritmos Pop dos anos 70 e 80.

O alcalde, Manolo González, aproveitou para convidar aos veciños da comarca así como a todas as persoas que visitan Outes e os concellos da contorna durante o mes de agosto, a participar neste evento que mestura comercio, gastronomía e música para tódolos públicos. O mandatario indicou que “con esta acción persíguese promocionar o comercio do concello así como dar a coñecer a propia vila da Serra de Outes entre os nosos visitantes, como un espazo ideal para facer compras, xantar ou dar un paseo á beira do río”.

A Feiriña 2020
A Feiriña 2020
A Feiriña 2020

Outes impulsa o comercio local coa Feiriña

Un total de 15 postos de venda instalarase na rúa da Capela, onde tamén haberá concertos e degustacións gastronómicas

O 8 de agosto, de 11:00 a 15:00 horas na rúa da Capela celebrarase A Feriña.

No marco da campaña de apoio ao comercio local do Concello de Outes, o día 8 de agosto botará a andar a primeira edición da Feiriña. Trátase dunha feira para que os establecementos da localidade poidan dar a coñecer os seus produtos nunha serie de postos que estarán decorados evocando un mercado tradicional, con sancosmeiros e berberechos incluídos.

A Feiriña nace cun total de 15 postos onde distintas firmas do municipio mostrarán a calidade dos seus artigos, nunha xornada que coincide co propio día da feira que se celebra habitualmente. «A nosa idea é que colla vida propia e sirva para animar aos empresarios a que se asocien e acheguen as súas propostas, ideas e demandas», explicou o alcalde, Manuel González.

Precisamente, o Concello preparou unha cita que contará con degustacións e sesión vermú. Ademais, a cantautora galego-palestina Najha Shami brindará un concerto ás 13.30 horas, para logo dar paso á actuación da cantante Sheila Patricia.

Outes dinamiza o uso do galego apoiando o comercio local

Baixo o título “Outes é comercio, Outes é galego” o Concello de Outes está a desenvolver unha campaña de dinamización lingüística coa que se pretende promover o emprego do galego como lingua habitual na realización do traballo diario dos negocios. Desde o Servizo de Normalización Lingüística apúntase que esta campaña procura darlle visibilidade ao galego como distintivo de prestixio do comercio de Outes.

A campaña “Outes é comercio, Outes é galego” responde a un dobre obxectivo; dinamizar a lingua galega en todos os ámbitos e colaborar co tecido comercial e hostaleiro fomentando o consumo local. No marco desta acción o concello distribuirá gratuitamente panos de mesa para os locais de hostalaría e bolsas de tea para o comercio, establecendo así, sinerxías e unificar esforzos na mellora da imaxe e da marca do tecido comercial outense.